სტუდენტების მიგრაცია ბორჯომიდან

სამცხე-ჯავახეთის სახელმწიფო უნივერსიტეტში ამ დროისთვის 963 აქტიური სტუდენტი ირიცხება,მათგან 50 ბორჯომელია.

ზუსტად რამდენი სტუდენტი მიდის ბორჯომიდან,  თბილისში (ან სხვა რეგიონში) არსებულ უმაღლეს სასწავლებელში, რთული გასარკვევია, რადგან ოფიციალური სტატისტიკური მონაცემები ამის შესახებ არ არსებობს.  

 

სამცხე-ჯავახეთის სახელმწიფო უნივერსიტეტი

საქართველოს სტატისტიკის ეროვნული სამსახურის ბოლო მონაცემებით, საქართველოში 124 223 სტუდენტი და 73 უმაღლესი სასწავლებელია.

მათივე ინფორმაციით, თბილისში 2014-2015 სასწავლო წლის დასაწყისისთვის 9 სახელმწიფო და 37  კერძო დაწესებულებაა. რეგიონების მიხედვით სასწავლო დაწესებულებათა რაოდენობა ასე გამოიყურება:

 

 

ბორჯომში სახელმწიფო უმაღლესი სასწავლებელი არ არის, სწორედ ეს არის ერთ-ერთი მიზეზი, რის გამოც ახალგაზრდები სასწავლებლად თბილისში მიდიან და სამასახურის ძებნასაც იქვე იწყებენ.

 

გიორგი ბალახაძე. 26 წლის. ჟურნალისტი. ილიას სახელმწიფო უნივერსიტეტის კურსდამთავრებული.

სპორტული ამბების ჟურნალისტი - გიორგი ბალახაძე წარმოშობით ბორჯომიდანაა.  მან ჟურნალისტიკის ფაკულტეტი, თბილისში არსებულ უმაღლეს სასწავლებელში დაამთავრა და მუშაობა დედაქალაქშივე გააგრძელა. ის ინტერნეტ გამოცემის “მსოფლიო სპორტი”-ს კორესპონდენტია. თვლის, რომ სამცხე-ჯავახეთში სპორტული ჟურნალისტიკა ნაკლებადაა განვითარებული და რეგიონში დარჩენის შემთხვევაში მას ამ სფეროში განვითარების ნაკლები პერსპექტივა ექნებოდა.

 

23 წლის ანა ხაჩიძემაც ჟურნალისტიკის ფაკულტეტი დაამთავრა ბაკალავრიატი თსუ-ში, შემდეგ  მაგისტრატურა PRის მიმართულებით ჯიპაში. ამჟამად,  ბავშვთა კვების იმპორტიორი კომპანიის მარკეტინგის დეპარტამენტში მუშაობს. როგორც თავად ამბობს, ბორჯომში იმ შემთხვევაში დაბრუნდება, თუ “კარგი” სამსახური და განვითარების მეტი საშუალება ექნება.


“ახლო მომავალში არ მაქვს გეგმაში ბორჯომში დაბრუნება, კარგი სამსახური მაქვს. შემდეგ რა მოხდება,  პერსპექტივებზეა დამოკიდებული. თუ ბორჯომში იქნება კარგი სამსახური, სიამოვნებით გადმოვალ” - ამბობს ანა ხაჩიძე.

სოფო ჩადუნელიც წარმოშობით ბორჯომიდანაა. “ილიაუნში” მე-4 კურსის სტუდენტია. სწავლობს ბიზნეს ადმინისტრირებაზე - მენეჯმენტის განხრით. პარალელურად მუშაობს კომპიუტერული ტექნიკის ერთ-ერთ მაღაზიაში გაყიდვების აგენტად.  ბორჯომში დაბრუნებას არ აპირებს.


“მაგისტრატურის გავლაც მინდა. ზოგადად მუშაობის და სწავლის მხრივ უფრო დიდი პერსპექტივაა აქ. ალბათ უფრო იმიტომ მინდა თბილისში დარჩენა, რომ ჩემი პროფესიით მივაღწიო რაღაც "ღირებულს" - ამბობს ჩვენთან საუბრისას სოფო ჩადუნელი.

 

ლაშა ამანათაშვილი, 22 წლის. “სეუ”-ს კურსდამთავრებული.

ლაშა ამანათაშვილმა უნივერსიტეტი წელს დაამთავრა, პარალელურად სწავლობდა ქსელის ინჟინერიას. სწავლის დასრულების შემდეგ მუშაობა ერთ-ერთ კომპანიაში დაიწყო.

 

“არამგონია ბორჯომში დავბრუნდე, რადგან შენი პროფესიითაც რომ არ მუშაობდე, თბილისში გაცილებით მეტი სამსახურია და ხელფასიც მაღალი, შესაბამისად მირჩევნია დედაქალაქში დარჩენა” - ამბობს ლაშა ამანათაშვილი.

 

გვანცა ლომიძე, 21 წლის, ექთანი.

გვანცა ლომიძეც თბილისში, სწავლის პარალელურად მუშაობს ინტენსიურ განყოფილებაში და პოსტოპერაციულში. ის ამჟამად სამედიცინო ფაკულტეტზე, მე-5 კურსის სტუდენტია. ზემოთ აღნიშნული ახალგაზრდების მსგავსად, გვანცას სამომავლო გეგმებიც თბილისს უკავშირდება.


გვანცა ლომიძე: “რომ დავამთავრებ უნივერსიტეტს, სავარაუდოდ რეზიდენტურაში ჩავაბარებ და თბილისში დავრჩები. თან უმცროსი ექიმი ვიქნები, თან ვისწავლი. ბორჯომში ყოფნის შემთხვევაში, განვითარების ნაკლები შანსი მექნებოდა, ამიტომ იქ დაბრუნება ჩემს გეგმებში არ შედის”.

იმის გამო, რომ ბორჯომი ტურისტული ქალაქია, სამუშაო ადგილები აქ ტურიზმის მიმართულებით უფრო მრავლადაა. ჩვენი ისტორიის ერთ-ერთი გმირიც სწორედ სასტუმროს თანამშრომელია. 

 

გოგი ხუციშვილი, 26 წლის. ბიზნეს ადმინისტრატორი. დაამთავრა ამერიკულ-ჰუმანიტარული უნივერსიტეტი და ივ. ჯავახიშვილის სახელობის თბილისის სახელმწიფო უნივერსიტეტი.

26 წლის გოგი ხუციშვილი ბორჯომში, ერთ-ერთ 5 ვარსკვლავიან სასტუმროში თავისი პროფესიით მუშაობს. უნივერსიტეტის დამთავრების შემდეგ, ის გარკვეული პერიოდის განმავლობაში თბილისში მუშაობდა, თუმცა საბოლოოდ მშობლიურ ქალაქში დაბრუნება გადაწყვიტა. სასტუმროში მუშაობა 4 წლის წინ დაიწყო.

 

ანასტასია აბაკელია ახალგაზრდების იმ კატეგორიას მიეკუთვნება, რომელიც თვლის რომ რეგიონში განვითარების ნაკლები პერსპექტივაა

 

ანასტასია აბაკელია, 17 წლის. აბიტურიენტი.

ანასტასია აბაკელიას სამომავლო გეგმებიც სავარაუდოდ თბილისს უკავშირდება. მას უმაღლესი განათლების მიღება თბილისში სურს და ფიქრობს, რომ სამუშაოდაც დედაქალაქში დარჩება. უნდა რომ ბორჯომის განვითარებაში საკუთარი წვლილიც შეიტანოს, თუმცა მშობლიურ ქალაქში დარჩენას არ აპირებს. თვლის, რეგიონებში განვითარების ნაკლები შესაძლებლობა და დაბალანაზაღაურებადი სამსახურებია, ეს არის მიზეზი რის გამოც, ახალგაზრდები მშობლიურ ქალაქს ტოვებენ.

 

რაც შეეხება დამსაქმებლების პოზიციას. ჯეო-ჰოსპიტალსის ბორჯომის სამედიცინო ცენტრში ამ დროისთვის 180 თანამშრომელი მუშაობს, მათგან 20% ახალგაზრდაა. სამედიცინო ცენტრის მენეჯერი - ირაკლი დიასამიძე აცხადებს, რომ ახალგაზრდა კადრების მოძიება მითუმეტეს სამედიცინო მიმართულებით განსაკუთრებით ჭირს.

 

 

 

ბორჯომის საგანმანათლებლო რესურს-ცენტრის ხელმძღვანელი - იზოლდა ლომიძე აცხადებს, რომ განათლების სფეროში კვალიფიციური კადრების დამატება სჭირდებათ. ამ დროისთვის, მუნიციპალიტეტის ზედა ზონაში მოხალისე მასწავლებლების მისაღებად კონკურსია გამოცხადებული, თუმცა მისივე ინფორმაციით, ჯერ-ჯერობით კვალიფიციურ მსურველს არ მიუმართავს. უცნობია ინფორმაცია იმის შესახებ, თუ რამდენი სტუდენტი რჩება დედაქალაქში უნივერსიტეტის დასრულების შემდეგ. მათი დარჩენის მიზეზიც განსხვავებულია: ზოგი მუშაობას იწყებს, ზოგი ოჯახს ჰქმნის და ა.შ. ფაქტია, რომ ბორჯომი ნელ-ნელა იცლება ახალგაზრდებისგან და შესაბამისად საკურორტო ქალაქი კარგავს ადამიანურ რესურსს. ბორჯომის მუნიციპალიტეტის გამგეობის, კულტურისა და ახალგაზრდობასთან ურთიერთობის სამსახურის უფროსი - მარინა ხუჯაძე აცხადებს, რომ ქალაქში ძირითადად ახალგაზრდების ის კატეგორია საქმდება, რომელიც ტურიზმის მიმართულებით სწავლობდა და უცხო ენებს ფლობს, რადგან ბორჯომი ტურისტული ქალაქია და ადამიანური რესურსის მოთხოვნაც ამ კუთხით განსაკუთრებით მაღალია. დავინტერესდით, თუ რას აკეთებს ადგილობრივი თვითმმართველობა, ბორჯომში ახალგარზდების დასაქმების მიზნით.

 

საქართველოს სტატისტიკის ეროვნული სამსახურის უკანასკნელი მონაცემებით, საქართველოში შრომის საშუალო თვიური ანაზღაურება 1 013 ლარია. თუმცა, ეს მაჩვენებელი მნიშვნელოვნად განსხვავდება ქვეყნის სხვადასხვა რეგიონის მიხედვით.

ყველაზე მაღალშემოსავლიანი მოსახლეობა დედაქალაქში თბილისში ცხოვრობს. ყველაზე დაბალშემოსავლიანი კი რაჭა-ლეჩხუმი და ქვემო სვანეთია. შედარებით მაღალშემოსავლიანია ტურისტულად აქტიური რეგიონები, მათ შორის აჭარა და მცხეთა-მთიანეთი. აქტიური ტურიზმი განაპირობებს მეტ სამუშაო ადგილს, მეტ დასაქმებულს და შესაბამისად, მეტ შემოსავალს. ამას ადასტურებს ის ფაქტიც, რომ ტურისტულად ყველაზე აქტიურ რეგიონში აჭარაში შრომის საშუალოთვიური ანაზღაურება თბილისის ანალოგიურ მაჩვენებელს მცირედით ჩამოუვარდება.

საშუალო თვიური ანაზღაურება საქართველოს რეგიონების მიხედვით:

 

გაგრძელდება თუ არა ბორჯომიდან სტუდენტების შიდა მიგრაცია, ამის განსაზღვრა ამ ეტაპზე რთულია. როგორ განვითარდება მოვლენები და რა ქმედით ნაბიჯებს გადადგამს ბორჯომის მუნიციპალიტეტი ადგილობრივი ადამიანური რესურსის შესანარჩუნებლად და მის ეფექტურად გამოსაყენებლად, თემას ტელეკომპანია “ბორჯომი” თვალს მიადევნებს.

 

Powered by  Jumpstart Georgia